“Report” “Akorda”ya xəbər verir ki, bunu Qazaxıstan Prezidenti Kasım-Jomart Tokayev Boao Asiya Forumunda söyləyib.

“Bu gün artan ticarət əngəlləri, proteksionizm və müqavilələrin pozulması qlobal iqtisadiyyat üçün ciddi problemlər yaradır. Bu problemlərin həlli ədalətsiz ticarət maneələrinin aradan qaldırılmasını və rəqəmsallaşma yolu ilə təchizat zəncirlərinin şəffaflığının artırılmasını tələb edir”, – Qazaxıstanın dövlət başçısı bildirib.

Tokayevin sözlərinə görə, qlobal maliyyə sisteminə yeni yanaşmalar tətbiq edilməlidir. Qazaxıstan lideri beynəlxalq ictimaiyyəti davamlı maliyyələşdirmə sahəsində daha effektiv tədbirlər görməyə çağırıb.

“Nəhəng bazar kapitallaşması ilə nəhəng Asiya istiqraz bazarı bir çox inkişaf layihələrini dəstəkləmək üçün yüksək potensiala malikdir. Avrasiya İnkişaf Bankı yeni maliyyə investisiya aləti kimi panda istiqrazlarının ilk buraxılışını həyata keçirməyi planlaşdırır. Bu, qlobal infrastruktur layihələrinin maliyyələşdirilməsi üçün kritik ola bilər”, – dövlət başçısı vurğulayıb.

Qeyd edək ki, bu il Boao Asiya Forumu “Asiya və dünya: ümumi çağırışlar, ümumi məsuliyyət” devizi altında martın 26-29-da keçirilir. Bu forum Şərqin Davosu adlanır – burada mühüm sənədlər imzalanır, Asiyanın və digər regionların biznes və hökumət dairələrinin nümayəndələri arasında mövqelər razılaşdırılır.