Azərbaycan xalqı tarixi ədaləti bərpa etdi » LidetTv İnformasiya Agentliyi

Tarixə nəzər salsaq, Azərbaycan xalqının qan yaddaşında qanla yazılmış zəfərlər görərik. Bunlardan biri də "Dəmir yumruq" adı ilə dünyaya səs salan İkinçi Qarabağ Müharibəsidir. Bu müharibə əslində bir missiya idi, tarixi ədalət missiyası. Əsrlər boyu torpaqlarımıza sahiblənmiş mənfur düşmənə öz həddini bildirmək zamanının yetişdiyini göstərən missiya..
Azərbaycan utancverən Birinci Qarabağ Müharibəsi içində səbirlə qan tökmədən, sülh yolu ilə düz 30 il humanistcəsinə gözləyirdi. Sadəcə vasitə olan Minsk qrupu isə məsələni uzadırdı. Dünya birliyi isə susurdu. Düşmən artıq bizim torpaqlarımızı unutduğumuzu düşünürdü. Çünki düşmən Azərbaycana təxribat, terror, hərbi təcavüz etməklə Dağlıq Qarabağ ərazisinə yiyələnmiş və Minsk qrupunun, ATƏT-in onların xeyrinə qəbul etdiyi qərarlarla meydan sulayırdı. Lakin cənab Prezidentimiz dəfələrlə görüşlərində torpaqlarımızın bir qarışını da düşməndə qoymayacağımızı bildirirdi.
Bəli, Böyük Zəfərin başlanğıcı - 2016-cı ilin Aprel döyüşləri Prezidentin fikrini təsdiqləyirdi. Amma qələbəyə gedən yol yenə sülh deyib "Tovuz döyüşləri" başlayana qədər səbir etdi. 11 gün davam edən bu döyüşdə Polad Həşimov və İlqar Mirzəyev şəhidlik zirvəsinə yüksəldi. Xalq əlində alilik zirvəsinə yüksəlmiş igidlərinin qanlı köynəyi ilə hər an "Döyüşə başla" əmrini gözləyirdi. Xalqın əlində bayraq olan qanlı köynəkdə Birinci Qarabağ Müharibəsinin utancı, acısı, necə-necə igidlərin qanı var idi. Xocalı yarası, Xəlil Rzanın Təbriz naləsi, Mübariz harayı, Şuşa nisgili və Poladın, İlqarın qurumamış qanı var idi. Düşmənin növbəti hücumu - 2020 -ci il sentyabrın 27-də səhər saatlarında torpaqlarımıza hücumu, dinc əhalini atəşə turması səbrimizin son damlası oldu və gözlənilən an gəldi. 44 günlük əzmkarlıq, igidlik, qəhrəmanlıq, döyüşkənlik və güclü siyasət.. Nəticədə uzun illərin gözlənilən qələbəsi...
Murovdağ, Suqovuşan, Cəbrayıl, Füzuli, Xudafərin körpüsü, Zəngilan, Qubadlı, Ağdam, Kəlbəcər, Lacın və nazlı Şuşa yenə bizim oldu. Düşmənin donuz otarıb, yallı getdiyi, tapdağı altında inildəyən torpaqlarımız artıq Vətən oğullarına, qızlarına qucaq acmışdı. Lakin asan başa gəlmədi düşməni qovmaq.... Dağ kimi oğullar itirdik, yaralandıq, gözlərimizdə qanlı yaş, ürəyimizdə oğul dərdi, amma əyilmədik. Çünki biz namusumuzu, tariximizi igidlərimizin qanı ilə xilas edirdik. Bu, haqq döyüşü idi və biz qalib olduq. Biz Prezidentimizin güclü siyasəti və igidlərimizin qəhrəmanlığı nəticəsində öz haqqımızı- öz torpaqlarımızı geri aldıq və tarixi ədaləti bərpa etdik.

Aytən Hüseynova,
Salyan şəhər inteqrasiya təlimli internat tipli gimnaziyanın müəllimi

Tarix: 30-06-2021, 11:01